Nöiikeitä

Nöii Internetsitä

04.04.2017: Wiukommä...! Die nöii Internetsitä vo dr HG Etzukofä isch ab hüt verfüegbar. Es si leider momentan numä fängs die wichtigschtä Inhäut verfüegbar, aber mir schaffä mit Hochdruck drann öiich witeri Müglechkeite chönnä z bietä. Säubschtverständlech chömä ab nöchscht Wucheänd o d Resultat vom Meischterschaftsschtart ufd Sitä. Ir Hoffnig öiich di nötigä Informationä vo üsere spannendä Seson chönne nööcher z bringä!


Öii Webbetröiig, Eveline u Jürg Zürcher

Meischterschaft gäge Chappälä

21.05.2017 (13:00): Leider het d B-Mannschaft nid chönnä a d Leischtig vom A aschliessä. Si het sech zwar im Riis u am Bock Müeh gä, doch dr Gägner isch klar überläge gsi. Mi het du no 2 Nummeronüüs müessä i chouf nä, wo i dä schtüürmischä Verhäutniss dr Wäg is Riis gfunge hei. Zwar het o Chappälä, im Riis, 2 Gou kassiert doch dr Punktevorschprung isch schlussändle z gross gsi.

Chappälä - Etzukofä B

2 / 787  -  2 / 717

Meischterschaft gäge Krouchtu-Hueb A

21.05.2017 (09:00): Top Leischtig vo dr A-Mannschaft. Am vergangenä Sunnti het s A-Team ernöiit ä grossä Schritt uf irem Wäg ir Nati B gmacht. Mi isch gägenä starche Gägner aträtte, het kämpft u isch siigrich vom Platz cho. Nid numä dass mä sech im Riis erfougrich het chönne verteidigä, sondern o am Bock isch das Team über Sich usegwachsä. Mit dr Ungerschtützig vom Luft u zaurichä Träffer het me gäge Krouchtu-Hueb ä grandiosä Gliichschtang chönne useholä. U mi cha mit stouz säge dass das Resultat s beschtä isch, wo sit langer langer Zit erreicht worde isch. Das zeigt dass di Mannschaft ufemenä guetä Wäg isch. Si trotz Niderlage witerkämpft, zämehet u witer versuecht a dr gseutä Herusäforderig ir Nati B z wachsä.

Bravo Gielä

Etzukofe A - Krouchtu-Hueb A

0 / 1163  -  3 / 1163

Meischterschaft gäge Röthebach i. E. A

13.05.2017 : Leider isch das Spiu vom vergangenä Wucheänd nid zu de Gunschtä vor A-Mannschaft glüffä. Mir hei üs zwar trotz diversnä Abwäseheitä ä gueti Punktzau erarbeitet, doch im Riis het mä ganz klar verseit. D Verhäutniss si sehr schwirig gsi u d Nousse schwär zum gse.

Somit het mä ernöiit ä 0-Rundi kassiert. Doch mir luege positiv vorus u kämpfe witer. Denn trotz derä Niderlag hets o no schöni Erläbniss gä, es chunt ja normalerwiis nid vor das mä mitem Helikopter zumenä Spiu gflogä wird. Wenn mä jedoch ä Rundflug vo dä Hornusser gschänkt überchunt, isch wird o das mügläch...!

Röthebach i. E. A  -  Etzukofe A

0 / 1134  -  3 / 1063

Meischterschaft gäge Wattewiu B

07.05.2017 (13:00): D B-Mannschaft hett ires Spiu am Sunntinachmittag nach dr A bestrittä. Si si uf Wattewiu greist um gäge s B-Team vo dört chönnä z spilä. Di Begägnig isch sehr intressant gsi u eher knapp usgange. Beidi Mannschaftä hei iri Riis chönnä suber phautä u so hei d Pünkt dr Usschlag über Siig u Niderlag gä. Doch d Ezukofer hei sech zum Glück chönne duräsetzä u hei das Spiu im zwöitä Umgang für siich entschidä. Somit het o d B-Mannschaft iri erschtä 4 Rangpünkt ir Meischterschaft 2017 chönne holä.

Wattewiu B  -  Etzukofe B

0 / 592  -  0 / 633

Meischterschaft gäge Thörigä A

07.05.2017 (09:00): A däm verrägnete Wucheänd, isch d A-Mannschaft daheimä gäge Thörigä A aträtte. Dr Gägner isch ambizioniert gsi das Spiu für sich z entscheidä, u so het sech dr Schpiuverlouf du o abzeichnet. Mä isch am Bockschtang nid so richtig i fahrt cho, sigs dürä glägentlech Nisuräge, dr usgeprägt Gägeluft oder dür di Fäuschtreichä wo si gschlage worde. So ischs Resultat zum Schluss dütläch fürä Gägner usgfauä, doch zmindescht d Riisarbeit het möge verhäbe u so hei mir trotzdäm no 2 Rangpünkt chönne verbuechä.

Etzukofe A - Thörigä A

0 / 847  -  0 / 1017

Meischterschaft gäge Oberönz-Niderönz A

30.04.2017: Am vergangenä Wucheänd het iz o d A-Mannschaft iri erschtä Pünkt chönä verbueche. Es isch äs schwirigs Spiu gsi u d Nousse nid eifach z fingä. Doch es isch nid numä für Üüs schwär gsi, o dr Gägner het z kämpfe gha. So hett mä zum Schluss trotz emenä Punkterückstand, aber enerä suberä Riisleischtig, di wichtigä 4 Rangpünkt chönnä erbä!

Oberönz-Niderönz A  -  Etzukofe A

2 / 1159  -  0 / 1088

Meischterschaft gäge Bäriswiu

29.04.2017: D B-Mannschaft het iz bereist ires drittä Meischterschaftsspiu gäge Bäriswiu bestrittä. Trotz emenä guete Schlagresutat het am Schluss aber numä 1 Rangpunkt usegluegt. Wüu ernöit ä Nouss si Wäg is Riis gfunge het u d Bäriswiler irersits si suber blibä, het dr Gascht di 4 Pünkt chönne erbä!

Etzukofe B - Bäriswiu

1 / 714  -  0 / 672

Meischterschaft gäge Arch-Oberwiu A

23.04.2017: S zwöite Meischerschaftsspiu vo dr A-Mannschaft het leider ernöit mit 0 Rangpünkt gändet. Es isch wider ä Nouss is Riis gheit u o i dä Pünkt hei mir Arch-Oberwiu nid mögä. Auerdings hei mir ä witerä Schritt uf üsem Wäg id Nati B chönnä mache. Mir hei äs guets Riis mit 283 Pünkt erziut u ä Gsammtpunktzau vo 1071 erreicht, das isch eis vo de beschtä Resultat sit langem!

Etzukofe A - Arch-Oberwiu A

1 / 1071  -  0 / 1129

Meischterschaft gäge Zäziwiu-Rütene C

22.04.2017: Zwöi witeri Rangpunkt trotz emenä Nummero. Somit bout d B-Mannschaft irä Punkteschtang uf 4 us.

Etzukofe B  -  Zäziwiu-Rütene C

1 / 740  -  2 / 574

Meischterschaft gäge Steinä b. Signou A

09.04.2017: O d A-Mannschaft het am vergangenä Wucheänd iri Meischterschaft agfangä, leider hets im Riis nid ganz möge verhäbe ud Pünkt hei o nid glängt. Doch mä lat sech vo däm Fäustart nid la beirrä u luegt sech, Schritt für Schritt, i di Nati B inezschaffä!

Steinä b. Signou A - Etzukofe A

0 / 1107  -  1 / 1024

Meischterschaft gäge Ätinge B

08.04.2017: S erschte Meischterschaftsspiu vo üserä B-Mannschaft, ä vorzognigi Begägnig gäge letscht Gägner vor Seson. U dürs Ändresutat bereits di erschte Rangpünkt ufem Konto.

Ätige B - Etzukofe B

2 / 571 - 2 / 697

Fründschaftshornussä z Gasu

26.03.2017: Mir si es witers mau z Gascht bi dr HG Gasu gsi. Si hei ires aujährliche Fründschaftshornussä düregfüehrt.

Höhepunkt, si di erschte zwöii Riis gsi, wo mir gueti 285 u 272 Pünkt gschlagä hei. Leider heimer im zwöitä Umgang nüm so erfougriich chönne spilä, zumau mir o im Riis ä Nouss hei la gheiä. So hets zum Schluss haut numä ä 5. Rang, mit 1 Nr. u 1027 Punkt gä.

D Gwinner vo dr Einzuuszeichnig ab 60 Pünkt.


Isch Beat / Isch Markus / Beckel Stefan / Studer Fritz

Isch Rolf / Studer Matthias / Zürcher Jürg / Isch Res


Härzlechi Gratulation

Wettspiu gäge Busswiu bi Büürä

25.03.2017: Vorbereitigsspiu vor B-Mannschaft gäge Busswiu. Usswärts gspiut bi schönem, aber windigem Wätter. Nid ganz suber blibä, aber trotzdäm erfougriich abgschlossä mit 3 Nummero u 760 Pünkt.

Busswiu BE  -  Etzukofe B

9 / xxx  -  3 / 760

Höck 2016

03.12.2016: S Jahr 2016 isch verbii u zum Jahresabschluss hei mir üsä Höck im Rössli z Ezukofä chönnä düräfüehrä.

Mir hei im vergangenä Jahr sehr viu dörfe erläbä. Sigs d Hörner am Interkantonalä, d Teilnahm am "Eidgenössischä Schwing- u Äuplerfescht" oder dr Ufstiig vor A-Mannschaft id Nati B. Sisch uf aufäu es intressants Jahr gsi.

Jetz isch aber Winterpousä agseit, bevor de scho wider d Vorbereitigä für di nöchschti Seson losgöö.

2017 © hg-etzelkofen.ch